Short咗

星期日行街行到腳仔軟。先係朝早同屋企人响荃灣兆和街嘅合發茶餐廳喫早餐,跟住我同家姐疙咗去如心廣場睇吓落成咗係乜樣。點知原來咩都冇,得間酒店開咗。隔離荃新天地又係未裝修完。結果唯有走去荃灣廣場行Jusco。不過一入廣場門口,就俾Wanko雞乸咁大隻字嘅「二折」牌嗍咗埋去。就咁樣就開咗市,家姐即刻搵到聖誕禮物俾阿媽同係Montreal嘅死黨同學。跟住再上幾層,喺間DVD/唱碟鋪搵埋老竇嘅禮物。Jusco嗰度反而乜都冇買就走咗。

第一回合完,就哽係食嘢補充能量。上次喺綠楊食越南河,發然仲有好多檔可以試。所以今日又番去綠楊,試另一檔唔知”Euro”乜鬼嘅(家姐溫馨提示:「係EuroGoGo呀。」)。啲意粉都OK,係嗰兩支奇異菓汁同橙汁甜咗少少。

補給完,我地就先分道揚鑣:家姐去銅鑼灣會合企鵝姐,開始佢嘅第二回合;我就去展開我嘅旺角探險。點解去旺角?因為我隻踎屎死咗。讀者一定諗:『踎屎死咗關旺角咩事呀?』。咁我就話你知啦。話說PCCW寄咗封信嚟話多謝我申請寬頻,所以送無綫踎屎,要去旺角挪。不過我點會淨係為咗隻踎屎去旺角丫。前世未迫過咩。其實我主要仲想搵OS X Leopard Family Pack,買番隻模型鉗,同撞吓仲搵唔搵到MG版F91。模形鉗喺烟廠街嗰邊好易搵。有個店員同我講有田宮兩款一貴一平,仲話貴啲嘅唔會咁易剪崩。我話「唔係啊嘛?剪膠咋啵。」所以最後去咗Modern買把最平嘅(50蚊)。隻F91我差啲搵唔到,得番一間有一千零一隻。原來因為唔好賣,好多鋪都冇再入貨。Leopard搵到我傻。出街前我就明知唔熟旺角,去中原地圖睇過信和中心同旺角電腦中心大概係咩位置。點知…去到旺角兜到我傻,嗰度啲遊客資訊牌又退晒色,都睇唔到啲街線,淨係睇到街名。Sino同MKCC又攪笑到冇牌嘅。攪到我問咗幾次啊sir先搵到MKCC。最後我見MKCC兩間有賣Apple嘅都斷Leopard嘅貨,知道冇機,就連Sino都放棄搵就去咗銅鑼灣join家姐同企鵝姐。去到銅鑼灣先發現佢地係搵我去破財擋災。家姐買咗對平平地嘅太陽眼鏡唔駛一個鐘就買咗兩件幾形嘅黑色casual恤衫自己著同兩條呔送比Montreal嘅朋友;咁就900蚊。跟住去睇吓有咩形戒指補番老竇唔見咗嗰隻。不過最後冇買,淨係睇咗款,因為我地唔肯定老竇手指咩嘥屎,刻咗名嘅話又冇得換;要等我地噠老竇其它戒指嚟度吓先。企鵝姐見我地攪咁耐,就游咗去第二檔睇衫,仲執到筍嘢。

之後就去咗SOGO睇玩具。原來我真係大鄉里,依家先知Sylvanian Family系列咁誇張嘅。酒店,水車,菓汁檔,你諗到就有。一傾之下,先知道企鵝姐玩得仲pro。佢嫌Sylvanian Family本身嗰幾款屋太細,所以用Hello Kitty嘅一款大屋代替。真係orz。我仲好奇想睇吓SOGO有咩Gundam貨,一睇之下先知佢食水深;隻F91我喺旺角買先168蚊,喺SOGO要259蚊。

行到攰,又到食嘢時間。去咗檔佈置得幾有越南feel嘅餐廳。叫咗牛肉河,燒豬肉檬,炸春卷,仲有招牌炸雞翼。每人70蚊左右埋單。

跟住家姐順便係藥房買牙刷,然後就分手番屋企。

番到屋企,由於眞係太攰,發生咗啲好hard plastic嘅事…

我好心急咁打開合F91睇說明書,見到呢幅嘢:

當時腦入邊嘅反應係『死嘞。唔記得買較剪添。』

0 thoughts on “Short咗”

  1. Somebody necessarily lend a hand to make significantly posts I might state. This is the very first time I frequented your website page and thus far? I surprised with the analysis you made to make this actual publish incredible. Magnificent job!

Leave a Reply

Your email address will not be published. Required fields are marked *